Молитвы святителю Спиридону

О великий и пречудный святителю Христов и чудотворче Спиридоне, керкирская похвало, всея вселенныя светильниче пресветлый, тёплый к Богу молитвиниче и всем к тебе прибегающим и с верою молящимся скоропредставленный заступниче!

Ты веру православную на Никейском Соборе посреде отцев преславно изъяснил еси, ты единство Святыя Тройцы чудесною силою показал еси и еретиков до конца посрамил еси.

Услыши нас, грешный святителю Христов, молящихся тебе, и сильным твоим предстательством у Господа избави нас от всякого злаго обстояния: от глада, потопа, огня и смертоносные язвы.

Ты бо во временней жизни своей от всех сих бедствий избавлял еси людей твоих: от нашествия агарян и от глада страну твою сохранил еси и многие грешники к покаянию привел еси и многие грешники к покаянию привел еси, мертвых преславно воскрешал еси, за святость же жития твоего Ангелы невидимо в церкви поющия и сослужащия тебе имел еси.

Сице убо прослави тебе, верного Своего раба, Владыка Христос, яка вся тайная человеческая деяния дарова тебе разумети и обличати неправедно живущия.

Многим в скудости и недостаточестве живущим ты усердно помогал еси, люди убогия изобильно во время глада напитал еси и ина многа знамения силою в тебе живущаго Духа Божия сотворил еси.

Сице и нас не остави, святителю Христов, поминай нас, чад своих, у Престола Вседержителя и умоли Господа, да подаст многих наших грехов прощение, безбедное и мирное житие да дарует нам, кончины же живота непостыдныя и мирныя и блаженства вечнаго в будущем веце сподобит нас, да выну возсылаем славу и благодарение Отцу и Сыну и Духу Святому, ныне и присно, и во веки веков.

Аминь.