Молитва святым благоверным Князю Петру и Княгине Февронии Муромским

О, велиции угодницы Божии и придивнии чудотворцы благовернии Княже Петре и Княгине Февроние, града Мурома предстатели и хранители, и о всех нас усерднии ко Господу молитвенницы!

К вам прибегаем и вам молимся с упованием крепким: принесите за нас грешных святыя молитвы ваши ко Господу Богу и испросите нам у благости Его вся благопотребная душам и телесем нашим;

веру праву, надежду благу, любовь нелицемерну, благочестие непоколебимое, в добрых делех преуспеяние, мира умирение, земли плодоносия, воздуха благорастворение, душам и телесем здравие и вечное спасение.

Исходатайствуйте у Царя Небесного всей державе Российской мир, тишину и благоустроение, и всем нам житие благополучное и добрую христианскую кончину. Оградите Отечество ваше, град Муром и вся грады российскии от всякого зла и вся правоверные люди, к вам приходящия и мощем вашим покланяющияся, осените благодатным действом благоприятных молитв ваших и вся прошения их во благо исполните.

Ей, чудотворцы святии! Не презрите молитв наших, со умилением вам возносимых, но будете о нас приснии предстатели ко Господу и сподобите нас помощию вашею святою спасение вечное получити и Царствие Небесное унаследовати; да славословим неизреченное человеколюбие Отца и Сына и Святаго Духа, в Тройце поклоняемого Бога, во веки веков. Аминь.